Día da Ilustración 2025
O Día da Ilustración celébrase cada ano o 30 de xaneiro, coincidindo coa data do nacemento de Castelao. Ademais de lembrar e reivindicar o papel dos profesionais da ilustración na industria cultural, cada ano homenaxéase un ilustrador galego. Esta edición de 2025 vai dedicada a Xosé Vizoso, que é o primeiro autor homenaxeado en vida.
O Día da Ilustración é un proxecto colaborativo da Consellería de Cultura, Lingua e Xuventude e a Asociación Galega de Profesionais da Ilustración (AGPI).
Luis Sendón
Ilustrador do cartel Di2025
Ilustrador e deseñador gráfico, Luis Sendón (A Coruña 1981) leva máis de 20 anos especializado en arte gráfica para festivais musicais de todo o mundo, e para bandas como Soziedad Alkoholika, Angelus Apatrida ou Municipal Waste. Membro do extinto colectivo Polaqia, asinou varios cómics para a revista Barsowia, así como o álbum Sálpock: O val dos Cegos, escrito por Álvaro López e editado por Demo Editorial. Actualmente codirixe o selo de cómics Altar Mutante, onde publica regularmente Reino d’Muertos (con guión de Manel Cráneo) e Amair (con guión de Kike Benlloch).
A noite de Castelao
Castelao naceu un 30 de xaneiro; ese é o motivo polo que desde 2017 celebramos o Día da Ilustración en Galicia. Para rememorar o seu legado, agradecelo e reflexionar sobre el, invitámoste a participar en «A noite de Castelao». Todas as noites ata o 30 de xaneiro, compartiremos nas redes ilustracións que versionen obras de Castelao a cargo de calquera autor ou autora que así o queira. Publicarémolas nas historias de instagram e rechouchiarémolas en X e Bluesky. Para que compartamos os teus castelaos, etiquétanos con @agpilustracion en Instagram, con @_agpi en X ou con @agpilustracion.bsky.social en Bluesky, poñendo o cancelo #AnoiteDeCastelao.
Tres visións de Vizoso
Tres ilustradores socios de AGPI interpretan o universo gráfico de Xosé Vizoso desde a súa visión persoal: Abi Castillo, Carlos Arrojo e Julia Abalde.
Contacta
Se queres ter máis información, ponte en contacto;
tentaremos resolver todas as túas dúbidas.
